Ávarp Steingríms J til félagsmanna VG í dag.

 Þetta ávarp Steingríms er að finna á heimasíðu VG.

Ég verð að segja að mér finnst þetta aum tilraun til að réttlæta þær gerðir sem meirihluti þingmanna VG og forustan stóð fyrir í dag. Allar vonir og beiðni Steingríms um að félagsmenn láti þetta mál ekki sundra félögmönnum í VG kemur of seint. Hann hefði betur gert félögum sínum grein fyrir því af hverju hann og þingmenn VG voru ekki reiðubúnir til að lát reyna á aðildarvilja þjóðarinnar í þjóðaratkvæði. Hefði slík ákvörðun endað stjórnarsamstarfið þá var það ekki þess vert að halda því áfram. Það að þessi niðurstaða hafi fengið yfirgnæfandi fylgi á flokkráðsfundi er of sagt, það rétta er að mjög skiptar skoðanir voru um málið bæði meðal félagsmanna og þingmanna þá eins og nú.

Ávarp frá Steingrími J. Sigfússyni

16.7.2009

Ágætu félagar,

Alþingi hefur nú samþykkt að Ísland óski eftir því að hefja aðildarviðræður við Evrópusambandið og að möguleg niðurstaða þeirra verði lögð í dóm kjósenda. Höfum það þó í huga að enn hefur engin ákvörðun verið tekin um að ganga í Evrópusambandið, hún verður ekki tekin fyrr en öll spil hafa verið lögð á borðið og það verður þjóðin sem mun taka hana komi til þess. Þannig er þessi niðurstaða vel samrýmanleg landfundarályktun í mars síðastliðnum sem lögð var fram í kjölfar mikils starfs innan flokksins sem allir flokksmenn gátu tekið þátt í.

Vinstrihreyfingin – grænt framboð telur nú sem fyrr að hagsmunum Íslands sé best borgið utan Evrópusambandsins.  Sjálfsagt er og brýnt að fram fari opin og lýðræðisleg umræða um samskipti Íslands og sambandsins. Landsfundur VG leggur áherslu á að aðild íslands að ESB eigi að leiða til lykta í þjóðaratkvæðagreiðslu.

Vissulega voru uppi hugmyndir um leiða málið til lykta á annan hátt og mörgum innan okkar raða er það óljúft að standa yfir höfuð að nokkurri hreifingu málsins í þessa átt. Ég dreg enga dul á að þetta mál hefur verið erfitt fyrir mig eins og okkur öll enda hefur flokkurinn frá upphafi tekið afstöðu gegn aðild Ísland að sambandinu. Þessi leið varð hins vegar niðurstaða stjórnarmyndunarviðræðna við Samfylkinguna og fékk yfirgnæfandi stuðning á flokksráðsfundi. Á þeim fundi kom í ljós eindreginn vilji til að mynda velferðarstjórn að norrænni fyrirmynd með Samfylkingunni og að myndun slíkrar stjórnar ætti að varða veginn fyrir endurreisn íslensks samfélags.

Nú munu væntanlega hefjast aðildarviðræður við Evrópusambandið. Með aðild sinni að ríkisstjórn getur Vinstrihreyfingin – grænt framboð haldið stefnu sinni og sjónarmiðum til haga á öllum stigum þeirra. Við munum leggja áherslu á að staðið verði vörð um íslenskan sjávarútveg og landbúnað, yfirráð þjóðarinnar yfir auðlindum sínum, velferðarkerfið og félagsleg réttindi og síðast en ekki síst lýðræðið sjálft. Leiði viðræðurnar af sér aðildarsamning þá verður hann rækilega kynntur fyrir þjóðinni og þannig tryggt að hún verði í aðstöðu til þess að taka upplýsta afstöðu til málsins. Komi það hins vegar í ljós að engann þann skilning á sérstöðu eða grundvallarhagsmunum Íslands verði að finna hjá viðsemjendum okkar að það gefi tilefni til að halda viðræðum áfram, þá höfum við einnig gert það alveg ljóst að við áskiljum okkur rétt til að leggja til á hvaða stigi sem er að þeim verði hætt. 

Kæru félagar, það er mikilvægt að við látum þetta mál, sem ég veit að afar skiptar skoðanir eru um innan hreyfingarinnar, ekki sundra okkur. Ákvörðun um aðild Íslands að Evrópusambandinu hefur nú verið sett í ferli sem mun annað tveggja leiða til þess að viðræðum verður hætt náist enginn viðunandi árangur eða að þjóðin á lýðræðislegan hátt gerir út um málið. Við þurfum á næstu mánuðum og misserum að sameina kraftana í glímunni við erfiðleikana hér heima. Til þess að sigrast á þeim þarf að grípa til margvíslegra og erfiðra ráðstafana, en við höfum þá trú að það sé betra að við gerum það sem gera þarf heldur en setja málin aftur í hendur þeirra sem bera höfuð ábyrð, bæði pólitískt og hugmyndafræðilega, á óförum okkar.

Hér á eftir fylgir sú atkvæðaskýring sem ég flutti við upphaf afgreiðslu málsins í dag:

Þegar tillaga þessi um aðildarumsókn að Evrópusambandinu kemur til lokaafgreiðslu vil ég árétta þá grundvallarstefnu Vinstrihreyfingarinnar græns framboðs að það þjóni ekki hagsmunum Íslands að gerast aðili. Við greiðum atkvæði um það hér á eftir hvort rétt sé eftir sem áður að láta reyna á í viðræðum hvers konar samningi sé hægt að ná til þess að þjóðin geti að því loknu hafnað eða samþykkt niðurstöðuna komi til hennar. Þingmenn Vg  eru bundnir af engu nema eigin sannfæringu varðandi það hvort sú leið skuli farinn. Hvoru tveggja afstaðan, að vera með því eða á móti er vel samrýmanleg stefnu flokksins. Öll eigum við það sameiginlegt að áskylja okkur rétt til málflutnings og baráttu utan þings sem innan í samræmi við grundvallaráherslur flokksins og okkar skoðun. Það tekur einnig til þess að hvort sem heldur er leggja til á hvaða stigi viðræðna við Evrópusambandið sem er, komi til þeirra, að þeim verði hætt ef þær eru ekki  að skila fullnægjandi árangri gagnvart grundvallarhagsmunum Íslands sem og að leggjast gegn óviðunandi samningsniðurstöðu.

Steingrímur J. Sigfússon

 

 

Athugasemdir

[Guðmundur Eyjólfur Jóelsson, 16.7.2009 kl. 17:37]

Ég get ekki annað lesið að þetta sé og hafi verið góð leið. Þingmenn vg hafa verið samkvæmir sjálfum sér og ég sem kjósandi vinstri grænna hef ekkert undan neinu að kvarta varðandi þessa afgreiðslu mála ,það kemur að okkur að eiga síðasta orðið þegar kemur að því að ákveða hvort við viljum hafna eða samþykkt þann samning sem gerður verður við ESB.

[Númi (IP-tala skráð) 16.7.2009 kl. 18:25]

Ég sem kjósandi VG er alfarið á móti því að aðildarviðræður fari fram,það er algjörlega einsýnt hvernig farið verður með okkur Íslendinga,ef til inngöngu kemur í þetta rammspillta ESB,nóg er spillingin hér heima fyrir.Steingrímur J er búin að vera,og fleiri í hans flokki,voru einsog hræddar kanínur við Samspillingarflokkin.Steingrímur er einsog kamelljónið sem getur skipt litum þegar því dettur það í hug,og ég sé eftir atkvæði mínu.

[Rafn Gíslason, 16.7.2009 kl. 20:06]

Guðmundur það kann að vera að þér finnist þetta ásættanlegt en það er mjög stór hópur kjósenda og Félagsmanna VG sem er þér ekki samála í þeim efnum.

Ég geri mér grein fyrir því að það eru sumir fálagsmenn VG ánægðir með þessa leið en þið eruð í miklum minnihluta í flokknum og það veist þú.

[Haraldur Hansson, 17.7.2009 kl. 13:58]

Það má alveg fallast á skýringu Steingríms Joð að ýmsu leyti, en það er ekki nóg. Það er munur á yfirlýstri stefnu fyrir kosningar og eftiráskýringum þegar búið er að klúðra.

Ég kaus Vinstri græna.

Ef Steingrímur Joð hefði sagt eitthvað þessu líkt, fyrir kosningar:

Við erum á móti aðild Íslands að ESB, en við erum samt tilbúin til að leggja fram þingsályktunartillögu um að sótt verði um aðild, ef tryggt er að hugsanlegur samningur verði borinn undir atkvæði þjóðarinnar.

Þá hefði málið horft öðruvísi við.

Þá hefði ég ekki kosið Vg. Þá hefðu ýmsir fleiri ekki kosið Vg. Þá hefði Fullveldishreyfingin hugsanlega ekki hætt við framboð. Vg fékk fjölmörg atkvæði vegna afstöðu sinnar til ESB og stefnu um að greiða ekki götuna fyrir umsókn. Það er grunnurinn af hinum stóra kosningasigri. Þessir kjósendur hafa verið sviknir.

[Rafn Gíslason, 17.7.2009 kl. 15:49]

Haraldur ég er þér sammál í greiningu þinni, ég sem félagi VG hafði ekki ímyndunarafl til að sjá þessi ósköp fyrir og varð það reiður að ég hef sagt mig úr flokknum. Við sem störfuðum fyrir flokkinn fyrir síðustu kosningar erum gerð að ómerkingum. Ég vil fyrir mína hönd biðja þig afsökunar á því að VG sveik þig og aðra kjósendur sína sem kusu VG vegna ESB afstöðu flokksins, og ég veit að sá kosninga sigur byggðist á þessum loforðum.