ESB umsókn eða ekki

Um  ESB og Vinstri hreyfinguna-grænt framboð.

 

Á landsfundi Vinstri hreyfingarinnar-græns framboðs í mars síðastliðnum var samþykkt ályktun um að Íslandi væri betur komið fyrir utan ESB en í ályktuninni segir orðrétt.

Vinstrihreyfingin - grænt framboð telur nú sem fyrr að hagsmunum Íslands sé best borgið utan Evrópusambandsins.  Sjálfsagt er og brýnt að fram fari opin og lýðræðisleg umræða um samskipti Íslands og sambandsins. Landsfundur VG leggur áherslu á að aðild íslands að ESB eigi að leiða til lykta í þjóðaratkvæðagreiðslu. Landsfundur telur mikilvægt að fyrirkomulag þjóðaratkvæðagreiðslu fái rækilega umræðu og að hliðsjón verði höfð af væntanlegum stjórnarskrábreytingum og hvað eðlilegt getur talist þegar afdrifaríkar ákvarðanir eru teknar um framsal og fullveldi.

Nú í samningaviðræðum Vinstri Grænna og Samfylkingar bregður hinsvegar svo við að ákveðið er að leggja aðildar umsókn fyrir alþingi til ákvörðunar með fulltingi VG.

Einnig var gefin út yfirlýsing af hálfu formanns Vinstri Grænna að flokkurinn færi óbundin í þá atkvæðagreiðslu og að þingmenn flokksins myndu greiða atkvæði eftir sannfæringu sinni. Þetta þykir mér heldur loðin svör svo ekki sé meira sagt. Hvað var verið að samþykkja á landsfundinum í mars varðandi afstöðu flokksins til ESB?  Ef ekki á að taka afgerandi afstöðu í þingflokknum með hliðsjón af stefnu hans og samþykktar landsfundarins í þessu máli þá þykir mér fokið í flest skjól og verið að hafa ályktun landsfundarins að engu.

Það er nú að koma í ljós að einhverjir þingmenn VG  telji sig ekki bundna af þessari ályktun og er ekki annað að heyra í fréttum en að formaðurinn sé því samþykkur.

Vinstri Grænir gáfu út yfirlýsingar fyrir kosningarnar í síðasta mánuði í þá veru að flokkurinn myndi í engu hvika frá stefnu sinni varðandi ESB. Því var haldið á lofti svo að ekki var um að villast að flokkurinn myndi ekki að selja sig í þessu máli. Það er einnig ljóst að VG fékk verulegt fylgi í síðustu kosningum út á þá yfirlýsingu.

Ég sem félagi og stjórnarmaður í félagi Vinstri Grænna í Ölfusi og Hveragerði krefst þess að flokksforystan  og þingmenn gangi hreint til verks og skýri afstöðu sína fyrir okkur félagsmönnum sem höfum starfað fyrir félagið í þeirri góðu trú að flokkurinn stæði við gefnar yfirlýsingar.

 Ég mun líta svo á að ef einhverjir þingmenn VG ætla sér að sitja hjá við væntanlega atkvæðagreiðslu og ef að það verður til þess að af aðildarumsókn verður samþykkt í þinginu þá mun ég líta svo á að um svik við stefnu flokksins sé að ræða og þá kjósendur sem kusu VG á forsendum fyrri yfirlýsinga hans í garð ESB.

Ég hef þá trú að margur ESB andstæðingurinn muni eiga erfitt með að kyngja slíkri niðurstöðu og tel reyndar að veruleg hætta sé á að það geti leitt til alvarlegs klofnings innan raða VG ef sú yrði raunin.

Ég ætla því að vona að þingmenn Vinstri Grænna hafi það í huga að þegar að atkvæðagreiðslu kemur.

 

 

 

 

 

 

Athugasemdir

[Gunnlaugur Ingvarsson (IP-tala skráð) 20.5.2009 kl. 16:00]

Gott hjá þér Rafn að ganga fast eftir þessu.

Ég og margir fleiri sem studdum VG í síðustu kosningum erum í losti yfir þessu undanhaldi og svikum.

Ég segi alveg eins og er að mér finnst VG hafa látið Samfylkinguna valta yfir sig í þessu máli og ef einstakir þingmenn VG ætla síðan að hlaupa frá samþykktri stefnunni og styðja þessi landráð Samfylkingarinnar þá er flokkurinn búinn að vera og getur alveg eins orðið að einhverri deild í Samfylkingunni, s.s. "Fagra Ísland og ESB"

VG á sér ekki tilvistar grundvöll sem alvöru stjórnmálaflokkur nema að hann stilli sér afdráttarlaust upp sem þjóðlegur flokkur sem standi ávallt þéttan vörð um þjóðfrelsið og sjálfstæði landsins, gegn ESB og allri erlendi ásælni.

Ég og fleiri munum ekki hafa þolinmæði öllu lengur fyrir þessu dæmalausa undanhaldi flokksforystunnar, nema spyrnt sé alvarlega við fótum og það fljótt !

Ef ekki þá munum við leggjast í harða stjórnaranstöðu gegn þessari óþjóðlegu Ríkisstjórn.

Vinstri eða hægri skipta þá engu máli lengur þegar fullveldi þjóðarinnar er í húfi ! 

Ég held að það sé full ástæða fyrir flokksforystuna að taka þetta mjög alvarlega sem ég er að segja. Ég er langt í frá einn um þessa skoðun

[Rafn Gíslason, 20.5.2009 kl. 20:52]

Gunnlaugur ég get ekki annað en verið sammála þér, VG er að kaupa þetta stjórnar samstarf mjög dýru verði ef ESB umsókn verður raunin. Það eru þó ekki allir í þingflokknum sammála þessu sem betur fer, má þar nefna Atla Gíslason en hann hefur ekki gefið tommu eftir í þessu máli.

[Helga (IP-tala skráð) 21.5.2009 kl. 13:19]

Er sammála um að þingmenn standi við landsfundarsamþykktina og greiði atkvæði gegn umsókn um aðild.

Landsfundarsamþykktin lá fyrir fyrir kosningar og hafi einhverjir núverandandi þingmanna ekki verið sammála samþykktinni þá áttu þeir að falla frá því að bjóða sig fram fyrir VG. En ekki bjóða sig fram til að svíkja samþykkt landsfundarins.

[Ingólfur (IP-tala skráð) 21.5.2009 kl. 13:39]

 Sælir félagar

ég er harður ESB andstæðingur en það er morgunljóst að það skapast aldrei friður í samfélaginu nema að ræða þetta mál til hlítar og þjóðin á rétt á að vita hvað er í boði og ég held vað þegar þjóðin uppgvötar hvað er raunvörulega lítið í boði miðað við þær fórnir sem við þurfum að færa, þá munu ESB ANDSTÆÐINGUM FJÖLGA MIKIÐ. og ég er alveg sannfærður um að þetta verður fellt í kosningum en það er algjör heigulsháttur og forheimska að þora ekki einu sinni að ræða þessi mál, það minnir á ógnarstjórn Davíðs Oddsonar þar sem engin þorði að hreyfa sig nema í takt við formanninn, þannig flokkur á VG ekki að vera. og það er ekki í anda VG að neita þjóðinni um lýðræðislega kostningu.

Ég er einmitt á því að forystan með Steingrím í fararbroddi séu að fara mjög vel með þetta mál við mjög erfiðar aðstæður.

þar fyrir utan er það stjórnarskrárbundinn réttur hvers þingmanns að greiða atkvæði með sinni sannfæringu.

kv  Ingólfur

[Páll Jóhannesson, 21.5.2009 kl. 13:41]

Hvað á sá VG þingmaður sem er sammála stefnu flokksins í öllu nema í ESB að gera? Er hægt að kalla hann svikara við að sitja hjá í atkvæðagreiðslu, hver er glæpurinn?. Getur ekki verið að einhverjir innan VG hafi ekki samþykkt landsfundarsamþykktina um að Íslandi sé best borgið utan ESB? Eiga menn ekki að hafa frelsi til að fylgja eigin sannfæringu, án þess að vera kallaðir svikarar?  Séu einhverjir þingmenn innan VG sem eru hlynntir því að Ísland fari í aðildarviðræður við ESB eru þeir þá ekki svikarar ef þeir samþykkja ekki tillöguna?

Það vill nefnilega þannig til að allir flokkar eru klofnir í afstöðu sinni og það er bara allt í lagi, þá kemur að því að menn fái að fara eftir sinni sannfæringu án þess að vera kallaðir svikarar. Fólk sem þorir að segja sína skoðun og standa á henni, er heiðarlegt og verðskuldar ekki barnalegar árásir bara fyrir það eitt að fylgja ekki elítunni.

[Loftur Altice Þorsteinsson, 21.5.2009 kl. 13:50]

Það sem hér kemur fram Rafn, á einnig flest við um Sjálfstæðisflokkinn. Landsfundur okkar hafnaði ESB-aðild, en ef Alþingi eða ríkisstjórn samþykkir umsókn er það vilji flokksins að þjóðaratkvæði fari fram, á grundvelli skilgreindra markmiða og samningskrafna.

Það er mín skoðun, að ef einhverjir þingmenn Sjálfstæðisflokks geta ekki stutt samþykkt landsfundarins, eigi þeir þann eina kost að boða forföll og láta varamann mæta til atkvæðagreiðslu. Hjáseta sem hugsanlega leiðir til samþykktar Alþingis er ekki ásættanleg.

[Dude (IP-tala skráð) 21.5.2009 kl. 14:05]

Í fyrsta lagi kemur hér fram ógurleg hræðsla við að fólk fylgi sinni eigin sannfæringu og í öðru lagi megn hræðsla við að fólkið í landinu fái að kjósa um málið.

Málið er að flestir þeir sem eru á móti ESB virðast líka vera á móti því að fólkið í landinu fái að kjósa um málið.

Ef að aðildarsamningurinn sem lagður verður fyrir þjóðina verður slæmur fyrir hana þá verður honum hreinlega hafnað og leita verður annarra framtíðarlausna fyrir Ísland.

Auðveldasta og þægilegasta lausnin felst í aðild að ESB EF að ásættanleg niðurstaða næst í auðlindamálum og stuðning við gjaldmiðlinn.

Er kannski ástæðan fyrir þessari hræðslu sú að rökin gegn aðildarviðræðum hafa öll verið skotin niður jafnharðan og þau hafa birst?

[Rafn Gíslason, 21.5.2009 kl. 15:30]

Ég vill þakka ykkur fyrir umsögnina. Ég lít svo á að þeir þingmenn VG sem ekki geta gengist við ályktun landsfundarins hefðu átt að koma hreint fram í kosninga baráttunni og segja kjósendum skoðun sína líkt og Atli Gíslason gerði bæði fyrir og eftir kosningar. Hvað varðar hræðslu mína við ESB þá er því til að svara að ég mun glaður sætta mig við að sótt verði um aðild ef það er vilji þjóðarinnar. VG vill að fram fari upplýst umræða um ESB svo að þjóðin geti myndað sér skoðun og gert sér glögga grein fyrir hvað ESB snýst um en þar er fleiru til að dreifa en evru , lágum vöxtum og ódýrum matvælum, en umræðan hefur að mestu snúist um þessi mál fram að þessu, af hverju má ekki upplýsa þjóðina um ESB í heild sinni, hvað er að óttast? Af hverju liggur svona reiðinnar ósköp á með að sækja um að ekki gefst tími til að ræða þessi mál. Hvað óttast ESB sinnar við það að upplýsa þjóðina?

[Páll Gröndal, 21.5.2009 kl. 15:31]

Sæll Rabbi, nýr bloggvinur!

Ég er sammála Ingólfi hér að ofan. Án þess að fara í viðræður og komast að raun um hvað í aðild felst verður aldrei hægt að ljúka umræðum um þetta mál. Ég tel að Íslendingar geti farið sömu leið og Norðmenn, þ.e. að fella aðild í þjóðaratvkæðagreiðslu. Án þess að vita hvað er í húfi annaðhvort í eða utan ESB, er ekki hægt að taka skynsamlega ákvörðun.

Kveðja

[Rafn Gíslason, 21.5.2009 kl. 16:09]

Komdu sæll Páll gaman að heyra frá þér. Já ég get um margt verið sammála því en ESB umræðan hefur að mínu mati verið alltof einsleit fram að þessu en það er margs að varast þegar að ESB kemur, hér þarf að fara fram miklu opnari og upplýstari umræða um ESB en verið hefur.  Það er þegar ljóst að engin aðildarþjóð hefur fengið neinar varanlegar undanþágur frá ESB sáttmálanum, einungis er í boði aðlögunar tími sem varir þetta í 2 til 5 ár og eftir það verða þjóðirnar að undirgangast að fullu ESB sáttmálan, svo mun einnig verða um okkur, það var meðal annars ein aðal ástæðan fyrir því að Norðmenn höfnuðu aðild tvisvar og vó afstaða sjávarútvegsins þar þyngst, þeir sóttu um varanlegar undanþágur en fengu ekki. En skoðaðu endilega heimasíðu heimssýnar þar er fjallað um ESB, aðgangur að henni er hér á bloggvinum mínum þar er margt fróðlegt um þessi mál.

[Loftur Altice Þorsteinsson, 21.5.2009 kl. 16:54]

Það virðist hafa farið framhjá sumum, að ESB-umræðan hefur staðið í 20 ár. Allt varðandi Evrópusambandið liggur ljóst fyrir og þarf bara að matreiða það fyrir almenning. Okkur er því ekkert að vanbúnaði að halda þjóðaratkvæði um aðildarumsókn.

Ef meirihluti er á Alþingi fyrir umsókn, er eðlilegt að leitað sé samþykkis þjóðarinnar. Getur meðferð málsins verið lýðræðislegri ? Samfylkingin óttast hins vegar að beita lýðræðislegum aðferðum og stendur gegn þjóðaratkvæði.

Ef þjóðin vill æskja inngöngu í ESB, þá er Alþingi réttur aðili til að leiða þær viðræður, en alls ekki Össur Skarphéðinsson eða aðrir Sossar. Alþingi verður að stjórna viðræðunum og samþykkja niðurstöðuna fyrir sína hönd. Síðan kemur til kasta þjóðarinnar að ganga formlega frá samningnum, ef það er almennur vilji.

Samstarf Alþingis og þjóðar um þetta mikilvæga mál er forsenda fyrir sátt. Ríkisstjórnin á hér hvergi að koma að. Samfylkingunni er alls ekki treystandi og raunar á ríkisstjórn hvernig sem hún er skipuð að standa á hliðarlínunni. Ríkisstjórnir eru ekki kosnar og standa því ekki í trúnaðarsambandi við þjóðina eins og Alþingi. 

[Rafn Gíslason, 21.5.2009 kl. 18:57]

Kæra Önd ósköp finnst mér málflutningur þinn á lágu plani, ég hélt að innan raða VG mætti skiptast á skoðununum, ef svo væri ekki þá ætti ég ekki heima í VG og myndi þar með kveðja eða eins og þú orðar það svo smekklega hipja mig burt, en kæra Önd sem betur fer veit ég betur því tek ég ekki orð þín alvarlega. Þú ættir hinsvegar að athuga hvort þú sért í réttum flokki.

[Hjörtur J. Guðmundsson, 21.5.2009 kl. 20:34]

Ingólfur:
Ef þú ert raunverulega á móti einhverju þá tekurðu ekki þátt í að opna á það. Það er einfaldlega ekki trúverðugt. Evrópumálin hafa verið rædd til hlítar og í langflestum tilfellum er vitað hvað innganga í Evrópusambandið hefði í för með sér og miklu meira en nóg til þess að hægt sé að taka afgerandi afstöðu til málsins.

Páll:
Þeir frambjóðendur VG sem hugsanlega hafa ekki verið sammála því að standa ætti utan Evrópusambandsins hefðu þá átt að lýsa því yfir FYRIR kosningar þannig að kjósendum væri ljós afstaða þeirra í kjörklefunum og gæti þá annað hvort sleppt því að kjósa VG eða a.m.k. strikað viðkomandi aðila út.

Dude:
Það er engin hræðsla til staðar heldur einfaldlega upplýst afstaða sbr. svar mitt til Ingólfs hér að ofan.

Öndin:
Landsfundarsamþykkt VG gaf enga heimilt til þess að farið skyldi í viðræður um inngöngu í Evrópusambandið.

[Jón Valur Jensson, 23.5.2009 kl. 03:21]

Dude skrifaði: "Málið er að flestir þeir sem eru á móti ESB virðast líka vera á móti því að fólkið í landinu fái að kjósa um málið." – Þetta er blekking. Það er krafa ófárra fullveldissinna, að fari svo, að Alþingi samþykki að sækja um inngöngu (=innlimun) í Evrópubandalagið, þá megi það ekki að gerast að þjóðinni forspurðri, heldur fái hún að segja sitt álit á þeirri umsókn í þjóðaratkvæðagreiðslu – fyrr verði ekki farið (á grundvelli nefndrar umsóknar) í þessar s.n. aðildarviðræður.

Svo lætur Dude (af hverju þetta dulnefni? – getur hann ekki horft framan í okkur undir eigin nafni?) eins og það séu fullveldissinnar, sem séu ólýðræðislegir! Samt yrði það afleiðing innlimunar i bandalagið, að fjöldi mála myndi færast undir ákvarðanir EB í Brussel og Strassborg, ákvarðanir sem við, kjósendur á Íslandi, hefðum nánast engin áhrif á! Það er nefnilega rétt hjá Bjarna Harðarsyni, að kosning með EB er = kosning gegn lýðræði.

"Ef að aðildarsamningurinn sem lagður verður fyrir þjóðina verður slæmur fyrir hana þá verður honum hreinlega hafnað ..." segir Dude líka. Hvernig þykist hann vita það? Samningurinn gæti vel verið samþykktur, þótt hann væri okkur í reynd EKKI hagstæður. Og hver er ástæðan? Jú, áróður og aftur áróður af hálfu hagsmunaaðila, sem horfa á eigin hag, ekki landsins. Áróður kostaður af hagsmunasamtökum. Áróður kostaður af EB (sem upplýsir ekki um það, hvað verði af 7% útgjalda sinna og hverra ársreikningar hafa ekki fengizt endurskoðaðir í 14 ár). Áróður manna, sem þegið hafa mútur í formi boðsferða til Brussel til að bræða þá og breyta þeim í áróðursmálpípur fyrir EB-innlimun, og þar eru meðtaldir ýmsir verkalýðsleiðtogar! Áróður (þ.e. margöld eyðsla "jámanna" miðað við það sem "neimenn" gátu eytt í sínar kynningu) skipti sköpum, þegar málið var lagt fyrir tékknesku þjóðina. Hræðsluáróður dugði í Svíþjóð (1994) til að merja 52% EB-sigur þar, en nokkrum árum seinna var "aðeins einn af hverjum þremur kjósendum sáttur við aðild" (Ragnar Arnalds). Þjóðir ákveða ekki alltaf það, sem þeim er fyrir beztu! – meðfram af því, að "skekkjumörk" frá réttri og raunsærri niðurstöðu markast oft mjög af öðrum þáttum en þekkingu og raunhæfu mati, t.d. af tízkukenndri tilfinningasemi, peningastreymi aðila, sem eiga hagsmuna að gæta, og látlausum áróðri (sbr. beinharða afstöðu yfirritstjóra beggja stórblaða okkar og þáttastjórnenda í Silfri Egils, Vikulokum Rúv, Spegli Rúv – a.m.k. einn mjög eindreginn áróðursmaður þar – og þættinum kl. 13 á laugardögum).

Það er því ekki með léttum hug, að maður segi: Afgreiðum þetta í þjóðaratkvæðagreiðslu! – enda teldi ég fullkomna ástæðu til að bjóða þá líka upp á hinn valkostinn: að við sækjum um aðild að NAFTA, sem er miklu útlátaminni en EB-innlimun, gerir t.d. enga kröfu til að fá hér fullt löggjafarvald eins og EB-"aðild" gerir).

Samt segi ég: Frekar tíu þjóðaratkvæðagreiðslur en eina! ef það má verða til þess að þjóðin geti stoppað af þá landráðatillögu, sem Samfylkingarmenn dreymir um.

En hver er það sem vill ekki þjóðaratkvæðagreiðslu um það, hvort fara eigi í aðildarviðræður? – Jú, hún Jóhanna Sigurðardóttir og hennar ólýðræðislega Samfylking!

[Rafn Gíslason, 23.5.2009 kl. 13:08]

Jón Valur þakka þér fyrir innlegg þitt og velkomin í bloggvinahópinn.

[Jón Valur Jensson, 23.5.2009 kl. 13:33]

Þakka þér, Rafn, mín er ánægjan, það er fengur að þér sem liðsmanni í okkar sístæðu sjálfstæðisbaráttu. Gangi þér vel á þessum vettvangi.

[Vésteinn Valgarðsson, 23.5.2009 kl. 18:42]

Það er sjálfsagt að ræða allar hliðar málsins, og þegar við erum búin að því höfnum við aðild á afgerandi hátt. Ef það þarf þjóðaratkvæðagreiðslu til þess að fella hana og kratabroddarnir átti sig, þá geta þeir fengið hana mín vegna.